umAGAPAY sa mga biktima ng Bagyong Ondoy at Pepeng

Maituturing na bangungot para sa mga nasalanta ng Bagyong Ondoy ang ika-26 ng Setyembre 2009. Nakakalungkot mang isipin, marami ang binawian ng buhay at nawalan ng tahanan o ari-arian dahil sa mapaminsalang hagupit ng kalikasan. Kaugnay nito, hindi nagdalawang isip AAGAPAY na tumulong sa mga biktima ng bagyo. Namahagi sila ng mga pagkain, inuming tubig, damit at tumulong sa paglilinis ng mga tahanang lubog sa putik.

Mula nang mawala ang mapaminsalang bagyo, ginawang araw-araw ang relief operations ng AAGAPAY sa mga nasalantang lugar. Noong ika-27 ng Setyembre, nagtungo sila sa Ampid, San Mateo, Rizal. Samantala, noong ika-28 ng Setyembre ay nagtungo naman sila sa Santolan, Pasig at sa Purok 7, Phases 1 & 2, Brgy Malanday, Marikina City. Noong ika-29 ng Setyembre, ang AAGAPAY ay bumalik sa Santolan, Pasig upang tumulong sa paglilinis ng mga tahanan at sa San Isidro at Village East Cainta, Rizal upang mamahagi ng mga relief goods. Noong ika-30 ng Setyembre, kasama ang AAGAPAY Youth, nagtungo sila sa Tipas, Taguig kung saan namigay sila ng relief goods at nagpakain ng lugaw upang maibsan ang kumakalam na sikmura ng mga kababayan nating nasalanta ng bagyo.

Dahil sa sinimulang pagtulong ng AAGAPAY, naantig ang puso ng mga may-ari ng CJJC Loans and Assistance Center na sina G. at Gng. John Young. Kusang loob silang nagbigay ng mga relief goods na nagkakahalagang isang daang libong piso (Php100,000). Samantala, ang mga kasamahan nating sina G. Elmer M Mallorca and G. Lemuel M Alcaraz ng M.ICON (Men Integrated for Community Order and Nationalism) ay ipinagamit ang kanilang sasakyan (elf) para sa relief operations.

Noong ika-2 ng Oktubre, nagtungo ang AAGAPAY sa Brgy Malanday, Marikina, City upang ipamahagi ang mga relief goods na ibinigay nina G. at Gng. Young. Ipinagamit din ng Immaculate Concepcion Parish ang kanilang lugar upang maging maayos ang gawain.

Naging inspirasyon ng AAGAPAY ang kalagayan ng mga nasalanta sa Tipas, Taguig kaya’t noong ika-7 ng Oktubre, muling nagpakain ng lugaw ang PPP 17 sa mahigit 300 katao sa Malanday, Marikina sa pakikipagtulungan ng Mason Marikina Lodge No. 119. Kaugnay nito, noong ika-12 ng Oktubre, ang PPP 17, AAGAPAY Youth at Mason Marikina Lodge ay nagtungo sa Industrial Valley Complex, Marikina upang mamahagi ng mga relief goods at mga bagong t-shirts sa halos 200 katao na naapektuhan ng bagyo.

Tunay na masarap ang pakiramdam ng makatulong sa kapwa lalo’t higit kung ang pagtulong ay bukal sa puso. Nabuhay ang kaugaliang Pilipino – ang bayanihan at sa pamamagitan nito, napatunayan natin na sa pamamagitan ng sama-samang pagtutulungan, mas madali tayong makakabangon sa anumang hamon.

PROGRAMANG PANGKASANAYAN

Pagtuturo ng Salita ng Diyos

Noong ika-24 ng Setyembre 2009, ang Pamunuan ay nagkaroon ng pag-aaral sa mga nilalaman ng Bibliya tungkol sa Pagbibinyag sa Tubig. Ito ay pinangunahan ni Pastor Sarcon at dinaluhan ng mga kasapi ng nasabing Pamunuan. Nang sumunod na araw ay pinanood nila ang video tape ni Ka Eli Soriano na pinangunahan ni G. Valenti Villaflor ng Church Of God. Nagsagawa naman si Ka Raffy ng pag-aaral sa mga kawani ng Office of Muslim Affairs sa Ipil, Zamboanga. Noong ika-27 ng Setyembre 2009, si Rev. Fr. Beltran Patanagan, ang pari sa Brgy. Galas Roman Catholic Church, Dipolog City ay nagpahayag ng Spiritual Enlightment sa mga kasapi na nakabase sa Zamboanga de Sur.

Pre-Membership Education Seminar

Noong ika-31 ng Agosto 2009, Si Ka Tito, Ka Nick, at Ka Constante, kasama sina Ginang Fe Laud at Araceli Lakandula mula sa Cooperative Development Authority (CDA), ay nagsagawa ng Pre-membership Education Seminar sa mga kasapi ng Mt Apo Highland Farmers Multi Purpose Cooperative.

Samantala, noong ika-13 ng Setyembre 2009 ay nagsagawa ng Pre-Membership Seminar sa Brgy. Poblacion, New Washington, Aklan na dinaluhan ng 54 kapanalig sa pangunguna ni Pastor Michael Baldesmo.

Noong ika-23 ng Setyembre 2009, sa ganap na ika-10 ng umaga ay nagsagawa ng Pre-Membership Seminar of Cooperative ang Pamunuan at ito ay dinaluhan ng 28 kapanalig. Ito ay ginanap sa Cottage 6, Aroma Beach, Brgy. San Roque, San Jose, Occidental Mindoro, na pinangunahan ni G. Ruel Lucena, Cooperative Specialist II, CDA ng nasabing bayan. Ang naturang pagsasanay ay natapos sa ganap na ika-12 ng tanghali. Matapos ang PMES, sa ganap na ika-1 ng hapon, ang nasabing grupo ay nagsagawa ng isang botohan upang bumuo ng inisyal na mga opisyales sa naisapinal nilang pangalan ng kanilang kooperatiba, ang Kaunlaran Para Sa Lahat Agri-Based Cooperative, na nauna nang iniulat ng pamunuang ito na Kaunlaran Para sa Lahat Multi–Purpose Cooperative.

Pagsasanay sa Paggawa ng Organikong Pataba

Samantala, noong ika - 5 ng Setyembre 2009, sa pangunguna ni Ka Teofilo Pescones at Ka Ricardo Mabale, ay nagsagawa ng isang pagsasanay tungkol sa paggawa ng organikong pataba na ginanap sa Clarenzon Marketing Plant ng Brgy. Mambatangan, Manolo Fortich, Bukidnon. Ang nasabing pagsasanay ay magtatapos ng hanggang labing limang (15) araw.

Seminar para sa Transport Cooperative

Nagkaroon ng seminar noong ika-29 ng Agosto 2009 sa pagpapatakbo ng Transport Cooperative. Ito’y dinaluhan ng 20 kapanalig (multi-sectoral group) ng South Cotabato. Ang nasabing aktibidad ay isinakatuparan at itinuro ng resource speaker na nanggaling sa CDA. Sa kasalukuyan ay isinasayos pa ng mga kasapi ang mga kailangan para makapagparehistro sa CDA.

Pagsasanay sa Bookkeeping/Accounting

Noong ika-8 ng Setyembre 2009 sa ganap ika-8 ng umaga hanggang ika-5 ng hapon, ang mga halal na pinuno ng AAGAPAY Chapter sa lalawigan ng Kalinga (Mula sa grupo ng Kalinga Small Ruminants Raisers Association (KASRRA) ay ipinagpatuloy ang paglahok/pagsasanay sa Bookkeeping and Accounting Seminar na hatid ng CDA at ng Provincial Cooperative Development Office (PCDO) na ginanap sa GOLDEN BERRIES HOTEL, Brgy San Juan, Tabuk, Kalinga. Ang nasabing pagsasanay ay matatapos sa ika-11 ng Setyembre 2009.

Pagsasanay sa Paggawa ng Sabon

Ang Pamunuan ng Batangas ay nagturo ng proseso sa paggawa ng liquid soap na pinangunahan nina Ka Christopher Santoyo at Ka Arnel Villena. Ang proseso ng nasabing paggawa ay unang itinuro ni G. Jerry Monde sa nasabing Punong-Kadre at sa mga kasapi ng Secretariat nito. Pinag-usapan din nila kung paano ito ipamamahagi sa mga target na mamimili, sa mga kasapi ng pamunuan, at sa kanilang pamilya.

Samantala, noong ika-21 ng Setyembre 2009 ay nagsagawa ang pamunuan ng pagsasanay sa Soap Making sa loob ng kanilang himpilan sa Bancasi, Butuan City na dinaluhan ng kanilang mga kasapi. Isa ito sa pangunahing negosyo ng kanilang kooperatiba. Marami ang nagka-interes sa negosyo at nakagawa na sila ng dalawang uri ng sabon, isang pampagandang herbal at isang Germicidal na sabon.

Pagsasanay sa Pag-aalaga ng Dory Fish

Noong ika-18 ng Setyembre 2009, ang pamunuan ay nagkaroon ng pagsasanay tungkol sa Dory Fish (Pangassius) Raising sa Mt. Kitanglad Hall na pinangunahan ni Imee Chun at tatlong kasamahan mula sa Vitarich Corporation. Bago ang naturang pagsasanay ay tinalakay muna ni Ka Riva ang tungkol sa Adbokasya ng AAGAPAY. Ang naturang pagsasanay ay tumatalakay kung paano palaguin ang palaisdaan at maparami ang Pangassius dito. Nagkaroon din ng libreng patikim sa mga dumalo mula sa produkto ng Pangassius. Ito ay dinaluhan ng 38 kasapi ng PPP-21 at ng iba pang mga kasapi sa Pambansang Pamunuan ng AAGAPAY. Pagkatapos ng pagsasanay ay nagkaroon ng tradisyunal na ‘boodle fight’ at ang namuno sa pagsasanay ay nagbenta ng mga produkto ng Pangassius Fish sa mga nagsipagdalo.

Kasanayan sa Pagpapalaki ng Baboy

Noong ika-08 ng Oktubre 2009 ay nagkaroon ng pagsasanay tungkol sa pagpapalaki ng baboy na ginanap sa Municipal Hall ng Pigkawayan. Ang nasabing kaganapan ay pinangunahan nina Dr. Jonathan Gumayagay (kinatawan ng Provincial Hog-Raising Industry at taga-payo ng Brave-Health Farm) at Boy Dapal (Hog Raiser Organizer sa North Cotabato at Municipal Agriculture Technician ng Pigcawayan, Cotabato). Kanilang itinuro ang New Packaged Technologies on Hog-Raising and Fattening Industry. Ito ay dinaluhan ng 60 katao na kinabibilangan nina Ka Monching at Ka Eduardo Amor Jr.